2026 жылдың 1 қаңтарынан 1 сәуіріне дейін коммуналдық қызметтер тарифтерін көтеруге мораторий енгізілген болатын. Алайда осы кезең аяқталғаннан кейін Лисаковскіде 2026 жылдың басынан қолданысқа енгізілуі тиіс болған бұрынғы баға тізімі сақталатын болады.

«Лисаковскгоркоммунэнерго» ӨШБ-ның бас экономисі Ольга Ремезованың айтуынша, жылу энергиясын өндіру мен тасымалдау қызметтері бойынша орташа өткізу тарифі 11%-ға өскен, бірақ халыққа көрсетілетін қызметтерді саралау тұрғысынан алғанда баға өспейді — тариф 2025 жылғы деңгейде қалады. Өзге тұтынушылар мен бюджеттік ұйымдар үшін жылу тарифінің өсімі 19%-ды құрайды. Сумен жабдықтау қызметі бойынша аталған санаттардың төлемі 7%-ға артады. Ағынды суларды бұру мен тазарту қызметтерінің құны 2025 жылғы деңгейде қалады — тұтынушылардың ешбір тобы үшін тариф өспейді.

2025 жылдың басынан бастап электрмен жабдықтау қызметін көрсету құқығы «ЭПК-forfait» ЖШС-нен «Лисаковскгоркоммунэнерго»-ға қайта оралғаны белгілі. Алайда мораторий қолданыста болғандықтан кәсіпорын тарифтерді бекіте алмады, сондықтан тұрғындар ЭПК ставкалары бойынша төлеуін жалғастырып отыр. Биылғы 20 наурызда «ЛГКЭ» Табиғи монополияларды реттеу департаментіне электрмен жабдықтау бағасын қайта қарау туралы өтінім берді. Өтінімді қарау шамамен бір айға созылуы мүмкін, сондықтан электр қызметтерінің жаңа құны тек сәуір айының соңында белгілі болмақ.